कांग्रेसमा दुई महाधिवेशनको टकराव, देउवा पक्षले मंसिरमा छुट्टै महाधिवेशन गर्ने
काठमाडौँ । नेपाली कांग्रेसभित्रको आन्तरिक विवाद र बढ्दो ध्रुवीकरणका बीच सभापति शेरबहादुर देउवा नेतृत्वको समूहले आगामी मंसिर २१ देखि २३ गतेसम्म काठमाडौँमा पार्टीको १५औँ महाधिवेशन गर्ने निर्णय गरेको छ।
महाधिवेशन संयोजन समितिका संयोजक डा. शशांक कोइरालाको अध्यक्षतामा बसेको बैठकले महाधिवेशनको उद्घाटन तथा समापन समारोह खुलामञ्चमा गर्ने निर्णय गरेको हो। त्यसैगरी, पदाधिकारी तथा केन्द्रीय सदस्य चयनका लागि मतदान राष्ट्रियसभा गृहमा गरिनेछ भने प्रतिनिधिहरूका लागि खाना तथा खाजाको व्यवस्था भृकुटीमण्डपको बगैँचामा गरिने तय भएको छ।
केन्द्रीय निर्वाचन समितिका सदस्यसचिव अमृत कार्कीका अनुसार महाधिवेशनका लागि मंसिर १९ गतेदेखि नै यी तीनवटै स्थान बुक गरिएको छ। देउवा समूहले कात्तिक १५ गते जिल्ला अधिवेशन सम्पन्न गरी ६ हजारभन्दा बढी प्रतिनिधिको सहभागितामा महाधिवेशन गर्ने जनाएको छ।
यसअघि कांग्रेसको अर्को पक्षले असोज १८ देखि २२ गतेसम्म काठमाडौँको खुलामञ्चमा १५औँ महाधिवेशन सम्पन्न गरिसकेको छ। उक्त महाधिवेशनबाट गगन थापा सभापति र विश्वप्रकाश शर्मा वरिष्ठ उपसभापतिमा निर्वाचित भएको बताइएको छ। सो महाधिवेशनमा करिब ७ हजार ५०० प्रतिनिधिको सहभागिता रहेको दाबी गरिएको थियो।
नवनिर्वाचित पदाधिकारीहरूले बिहीबार सानेपास्थित पार्टीको केन्द्रीय कार्यालयमा पद तथा गोपनीयताको शपथसमेत लिइसकेका छन्।
यसरी कांग्रेसको एउटा पक्षले नयाँ नेतृत्व चयन गरी कार्यभार सम्हालिसकेको अवस्थामा देउवा पक्षले छुट्टै महाधिवेशन गर्ने निर्णय गरेपछि पार्टीभित्र दुई समानान्तर समूहबीचको विवाद थप पेचिलो बनेको छ। यसले पार्टीको आधिकारिकता, संगठनात्मक एकता र भावी राजनीतिक दिशाबारे प्रश्न खडा गरेको छ।
.jpg)
.jpg)
.jpg)
