दक्षिणी गाजाको खान युनिसस्थित नासेर अस्पतालमा भएको इजरायली आक्रमणले विश्वव्यापी निन्दा आह्वान गरेको छ। आक्रमणमा पाँच पत्रकारसहित कम्तीमा २० जनाको ज्यान गएको हमासद्वारा सञ्चालित स्वास्थ्य मन्त्रालयले जनाएको छ।

संयुक्त राष्ट्र महासचिव एन्टोनियो गुटेरेसले यो घटनाले युद्धग्रस्त गाजामा चिकित्सक र पत्रकारले भोगिरहेको असह्य जोखिम उजागर गरेको टिप्पणी गर्दै ‘तत्काल र स्थायी युद्धविराम’ तथा ‘निष्पक्ष अनुसन्धान’ को माग गर्नुभएको छ।

युएनआरडब्ल्यूएका प्रमुख फिलिप लाजारिनीले पत्रकारको हत्या गम्भीर आक्रोशको विषय भएको भन्दै “अनिकालका बीच निसर्त सत्य सुनाउने अन्तिम आवाजहरूलाई मौन पारियो” भनेर तीव्र आलोचना गर्नुभयो।

बेलायती विदेशमन्त्री डेभिड लामीले आक्रमणले आफू स्तब्ध भएको बताउँदै तत्काल संयमता अपनाउन आग्रह गर्नुभयो। फ्रान्सेली राष्ट्रपति इम्यानुएल म्याक्रोँनले यसलाई “सहनै नसकिने” भन्दै कठोर शब्दमा विरोध जनाउनुभयो। अमेरिकी राष्ट्रपति डोनाल्ड ट्रम्पले समेत “यस घटनाबाट खुशी नभएको” अभिव्यक्ति दिएका छन्।

गाजामा सन् २०२३ को अक्टोबरयता सुरू भएको युद्धपछि मृत्यु हुने पत्रकारको संख्या करिब २०० पुगेको तथ्य प्रकाशमा आएको छ, जसले यो युद्धलाई ‘सत्य र आवाजमाथिको आक्रमण’ को रूपमा चिनाउने आलोचकहरूको धारणा बलियो बनाएको छ।