अखिल नेपाल फुटबल महासङ्घ (एन्फा) ले बङ्गलादेशसँगको मैत्रीपूर्ण फुटबल प्रतियोगिताका लागि तयारी पूरा भएको जनाएको छ।

एन्फाले आज काठमाडौँमा आयोजित पत्रकार सम्मेलनमा भदौ २१ र २४ गते हुने खेलका लागि सबै तयारी पूरा भएको जानकारी गराएको हो। प्रतियोगिताका टिकट सामान्य पारापिटतर्फ ५ सय रुपैयाँ र भीआईपी पारापिटतर्फ १ हजार रुपैयाँमा उपलब्ध हुने एन्फाले जनाएको छ।

पत्रकार सम्मेलनमा प्रवक्ता सुरेश शाहले बङ्गलादेशको राष्ट्रिय टोली पर्सि नेपाल आइपुग्ने र उनीहरूको अभ्यासका लागि भद्रकालीस्थित नेपाली सेनाको खेलमैदान तथा ललितपुरको च्यासल रंगशालाको व्यवस्था गरिएको जानकारी दिनुभयो।

प्रतियोगिता त्रिपुरेश्वरस्थित दशरथ रंगशालामा आयोजना हुने छ भने खेलको अनुमानित बजेट १ करोड २७ लाख रुपैयाँ रहेको एन्फाले जनाएको छ।