अमेरिकी अन्तरिक्ष प्रविधि कम्पनी स्पेसएक्सले आफ्नो विशाल रकेट **‘स्टारशिप’**को ११औं परीक्षण उडान सफलतापूर्वक सम्पन्न गरेको छ। कम्पनीले विकास गरेको यो अत्याधुनिक रकेट भविष्यमा मानवसहितको चन्द्रमा, मङ्गल ग्रह तथा अन्य अन्तरिक्ष यात्राका लागि प्रयोग गर्ने लक्ष्य राखिएको छ।

अमेरिकाको टेक्सास राज्यस्थित स्टारबेस प्रक्षेपण केन्द्रबाट अक्टोबर १३ मा प्रक्षेपण गरिएको ‘स्टारशिप’को उडान सफल रहेको स्पेसएक्सले जनाएको छ। रकेटको ‘सुपर हेभी’ भनिने तल्लो भाग मेक्सिकोको खाडीमा सुरक्षित रूपमा समुद्रमा अवतरण भएको छ भने माथिल्लो भागले आफ्नो चढाइ पूरा गरी अर्को चरणमा प्रवेश गरेको कम्पनीले जनाएको हो।

स्पेसएक्सका अनुसार यस्ता परीक्षणहरू भविष्यमा चन्द्रमा र मङ्गल ग्रहमा मानवसहितको यात्रा सम्भव बनाउन आवश्यक पूर्वतयारीका रूपमा गरिँदै आएका छन्। यो रकेट पूर्ण रूपमा पुनः प्रयोग गर्न सकिने (Reusable) प्रविधिमा आधारित भएकाले अन्तरिक्ष यात्रालाई दीर्घकालीन रूपमा किफायती र दिगो बनाउने उद्देश्य रहेको कम्पनीले स्पष्ट पारेको छ।

चिनियाँ समाचार संस्था सिन्ह्वाका अनुसार, यो परीक्षणले स्पेसएक्सलाई मानवसहितको अन्तरिक्ष अभियानतर्फ एक महत्वपूर्ण कदम अगाडि पुर्‍याएको छ।