मधेश प्रदेशका सभामुख रामचन्द्र मण्डल पद अनुकूल आचरण नगरेको आरोप लागेपछि बुधबार प्रदेश सभामा दर्ता भएको प्रस्ताव दुई तिहाइ बहुमतसहित पारित भई उनी पदमुक्त भएका छन्। प्रदेश सभाको बैठकमा प्रस्तावबारे विस्तृत छलफलपछि मत विभाजन प्रक्रियामार्फत निर्णय लिइएको हो।

उपसभामुख बबिताकुमार राउत ईशरका अनुसार सभामुखविरुद्ध दर्ता गरिएको प्रस्तावको पक्षमा ७६ मत परेको थियो। बैठकमा कुल ७८ जना सांसद उपस्थित रहे। २७ कात्तिकमा सात दलीय गठबन्धनका ६४ सांसदहरूले सभामुख मण्डल पदअनुकूल आचरण नगरेको भन्दै प्रस्ताव दर्ता गराएका थिए।

छलफलका क्रममा नेपाली कांग्रेसका प्रमुख सचेतक कुमारकान्त झाले प्रस्ताव पेस गरे। त्यसपछि लोसपाका उपेन्द्र महतो, जसपा नेपालका मनिषकुमार सुमन, सञ्जयकुमार यादव, राजकुमार गुप्ता, कांग्रेसकी जीवछीदेवी यादव तथा नेकपा एकीकृत समाजवादीका गणेश पटेल र प्रमोद यादवले आफ्ना धारणा व्यक्त गरे।

यसबीच, नेकपा एमालेका एक सांसद प्रारम्भिक बैठकमा उपस्थित भए पनि बैठक स्थगित भएपछि पुनः सुरु भएको सत्रमा कुनै पनि एमाले सांसद उपस्थित थिएनन्। प्रस्ताव पारितसँगै सभामुख मण्डलको पद औपचारिक रूपमा रिक्त भएको छ।